Minisitiri w’Intebe wungirije w’Ubwami bwa Lesotho, Nthomeng Majara n'itsinda ayoboye bari mu ruzinduko rw'akazi mu Rwanda, basuye Akarere ka Bugesera mu rwego rwo kwigira ku mikorere n'imikoranire y'Akarere n'Abafatanyabikorwa bako. Bakiriwe n'Umuyobozi w'Akarere Mutabazi Richard.

Umuyobozi w'Akarere Mutabazi Richard yagaragarije iri tsinda ishusho rusange y'Akarere n'uruhare rw’abafatanyabikorwa b’Akarere bibumbiye mu Ihuriro ry’Abafatanyabikorwa b’Akarere ka Bugesera (Joint Action Development Forum-JADF Bugesera) mu bikorwa biteza imbere abaturage binyuze mu nkingi y'Ubukungu, Imibereho Myiza ndetse no mu nkingi y'Imiyoborere Myiza n'Ubutabera.

Minisitiri w’Intebe Wungirije wa Lesotho, Nthomeng Majara, yagaragaje ko u Rwanda rumaze gutera intambwe ishimishije mu guteza imbere imibereho y’abaturage, ashima uburyo abafatanyabikorwa b’Akarere bagira uruhare mu bikorwa bizamura iterambere n’imibereho myiza y’abaturage.

Umuyobozo w’Akarere ka Bugesera, Mutabazi Richard yashimiye iri tsinda riturutse mu bwami bwa Lesotho kuba bahisemo gusura Akarere ka Bugesera no kukigiraho ku mikorere n’imikoranire hagati yako n’abafatanyabikorwa baho. Yabagaragarije kandi uruhare rw’abafatanyabikorwa mu iterambere ry’abaturage.

Muri uru ruzinduko, basuye umufatanyabikorwa w'Akarere, Gasore Serge Foundation, ufite ibikorwa bitandukanye mu Murenge wa Ntarama, mu Kagari ka Kibungo, basobanurirwa bimwe mu bikorwa bikorerwa muri iki kigo; birimo ikibuga cy'amagare (The Field of Dreams), amashuri ndetse n'aho ikipe y'amagare ya Bugesera y'abakobwa ikorere imyitozo n'icumbi ryabo.