Kuri uyu wa Gatanu, tariki ya 02 Kanama 2024, Umuyobozi w’Akarere wungirije ushinzwe Iterambere ry’Ubukungu, Umwali Angelique, yifatanyije n’abaturage b’Umurenge wa Nyarugenge mu birori byo kwizihiza umunsi w’umuganura mu Rwanda wizihizwa buri Gatanu w’icyumweru cya mbere cy’ukwezi kwa Kanama buri mwaka.

Ibirori byo kwizihiza umunsi w'umuganura byari bifite insanganyamatsiko igira iti: ”Umuganura, Isoko y’Ubumwe Ishingiro ryo Kwigira”.

Ni ibirori byabereye hirya no hino mu Midugudu, mu Mirenge yose igize Akarere naho ku rwego rw’Akarere ka Bugesera bibera mu Murenge wa Nyarugenge.

Ni umunsi waranzwe n'ubusabane hagati y’abaturage n’abayobozi mu rwego rwo kwishimira no gusangira ibyavuye ku musaruro abaturage bejeje uyu mwaka ndetse hanamurikwa bimwe mu bikorwa by'ubuhinzi, ubworozi, iterambere n'ibindi.

Mu birori byo kwizihiza umunsi w’Umuganura hanamuritswe bimwe mu bikorwa by'ubuhinzi, ubworozi, iterambere abatuage bagezeho muri uyu mwaka.

Ni ibirori kandi byaranzwe n’imbyino gakondo n’ibikorwa byo gusigasira umurage w’u Rwanda ukubiyemo indangagaciro z’umuco Nyarwanda birimo nko gukama inka, gucunda amata, gusya hakoreshejwe urusyo rwa Kinyarwanda, guteka ndetse no kurya ibiryo bya kinyarwanda.

Umuyobozi w’Akarere wungirije ushinzwe Iterambere ry’Ubukungu, Umwali Angelique, yashimiye abaturage b’Akarere ka Bugesera bitabiriye umunsi w'umuganura ndetse n'uburyo mu gihembwe cy’ihinga gishize bitabiriye ibikorwa by'ubuhinzi bikaba byaranatanze umusaruro mwiza bakeza imyaka myinshi none bakaba baganuzanyije, abasaba n’ubundi gukomeza uwo muhate n’ishyaka bitegura neza igihembwe cy'ihinga 2025 A.

Yagize ati: “Turabashimira ku musaruro mwinshi wabonetse mu gihembwe gishize, ariko turanabashishikariza kwitabira igihembwe cy’ihinga cya 2025 A, aho twihaye intego y’uko tugomba guhinga ubutaka bwose buhingwa, kandi tukongera umusaruro ho 10% kuri buri gihingwa”.

Umunsi w’Umuganura ni umunsi ukomeye ku Banyarwanda kuko ubafasha kwishimira ibyagezweho, kwisuzuma no kureba ibitaragenze neza no guhigira gukora cyane mu myaka itaha.

Mu kwizihiza umuganura, ababyeyi beretse abakiri bato uko kera bacundaga amata ndetse bakanasya amasaka, ingano ibigori n'ibindi bakoresheje urusyo rwa Kinyarwanda.