Kuwa 23 Gicurasi 2018, mu murenge Mayange mu karere ka Bugesera, Komisiyo ya Koreya ikorana na UNESCO ifatanyije na Komisiyo y’Urwanda ikorana na UNESCO ndetse n’Akarere ka Bugesera batashye ku mugaragaro inyubako yitwa Urumuri. Umuhango wo gutaha icyo kigo ku mugaragaro witabiriwe na Nyakubahwa Eung-Joong Kim ambasaderi w’igihugu cya koreya y’epfo mu Rwanda. Iki kigo cyubatswe ku nkunga n’ubufatanye bwa Komisiyo ya Koreya ikorana na UNESCO, Komisiyo y’Urwanda ikorana na UNESCO n’Akarere ka Bugesera; kizigisha abana b’inshuke n’abakuze biga gusoma, kwandika no kubara. Nk’uko Albert Mutesa Umuyobozi wa Komisiyo y’Igihugu ikorana na UNESCO avuga icyo kigo cyarangije kubona abakozi. Ibindi bikorwa biteganyijwe gukorerwamo ni ukwiga imyuga. Ku ikubitiro ni ubudozi. Mu ijambo rye, Bwana James Gashumba Umuyobozi wa Kaminuza Rwanda Polytechnic, wari uhagarariye Minisitire w’Uburezi yasabye abaturage kuzibanda ku myuga, ibateze imbere, bateze imbere n’igihugu.